أفضل 5 بودكاست مفيده وممتعه

مقدمه عن الموضوع

من الحاجات اللي اكتشفتها مؤخرا وندمت اني مكنتش أعرفها قبل كده هي البودكاست. وفي البدايه لو متعرفش يعني ايه بودكاست فده بكل اختصار معناه ان شخص بيتكلم في موضوع معين في تسجيل صوتي.ولما تجرب تسمعه مره واحده هتفهم لوحدك يعني ايه بودكاست متقلقش.

المهم أنا بقا جاي انهارده أقولكم علي أكتر البودكاستس اللي بحبها واللي فرقت معايا في حياتي ، واللي غالبا برضو هتفرق معاك في حياتك انت كمان. البودكاستس من وجهة نظري حققت المعادله الصعبه : مفيد ومسلي وجميل في نفس الوقت ، وكمان مناسبه جدا للزمن بتاعنا ده لان وقت كبير جدا بيضيع في المواصلات.

وأنا شايف ان أجمل حاجه ممكن تعملها في المواصلات ( بعد القرآن طبعا ) هي انك تسمع بودكاست في أي مجال انت بتحبه.

بس أنا انهارده جايبلك بودكاستس هتفيدك بوجه عام مش خاصه بمجال معين.

فاا يلا بينا نبدأ …

ايه أفضل تطبيق تسمع عليه بودكاست؟

في البدايه طبعا لازم تحمل أبلكيشن Google Podcasts لان ده اللي عليه كل البودكاستس اللي هقولك عليها انهارده.

– وده لينك تحميل الأبلكيشن للأندرويد 👈Google Podcasts .
– وده لينك التحميل علي أي أو اس👈Google Podcasts .

ودلوقتي بقا خلينا نبدأ علاطول بأول وأقرب بودكاست لقلبي وهو بودكاست دروس أونلاين اللي بيقدمه أحمد أبو زيد ( مؤسس قناة دروس أونلاين ).

1 – دروس أونلاين

واحد من أجمل البودكاستس اللي سمعتها في حياتي ، واللي مش بس ممتع وبيخليك متحس بالوقت وانت بتسمعه ، لا ده كمان بيكون مفيد جدا جدا.
وده لان أحمد أبو زيد كل مره بيستضيف شخصيه ناجحه في الحياه وبيحكي قصته كامله بكل الصعوبات اللي واجهها ، بالدروس اللي اتعلمها في حياته.
تخيل انك بتاخد ملخص حياة انسان تاني في ساعتين بس ، بالتجارب اللي عاشها والصعوبات اللي واجهها والنجاحات اللي حققها.
بجد البودكاست ده جميل جدا وأنصحك تبدأ بيه وعن تجربه هتحبه جدا.

وده لينك البودكاست : بودكاست دروس أونلاين .

2- فنجان مع عبدالرحمن أبو مالح

ده البودكاست اللي كان استضاف الشيخ ياسر الحزيمي واللي عمل بودكاست بعنوان ( كيف تنجح العلاقات ) وده واحد من أكتر البودكاستس العربيه اللي اتسمعت لانها تخططت الملايين والملايين ، كل يوم أحد بيستضيف ( عبدالرحمن أبو مالح ) ضيف جديد وبيتكلمو في مواضيع مختلفه.

البودكاست مفيد وجميل جدا جدا وأنصح بيه لأي حد لسه بادئ يسمع بودكاست.

وده لينك البودكاست : بودكاست فنجان مع عبدالرحمن أبو مالح .

3- Seven Good Minutes

بودكاست مفيد — ازاى تبدأ علي السوشيال ميديا في سنة 2023

تفتكر انت تقدر تعمل ايه في 7 دقايق؟ دي فكرة البودكاست التالت معانا انهارده. وهو ان كل يوم بينزل بودكاست مدته 7 دقايق بس وبيكون فيهم حاجه مفيده في مجالات مختلفه.

الهدف منه ان كل يوم يعطيك كام معلومه سريعه عشان تطور من نفسك وتحسن من يومك وجودة حياتك. وفي مجالات مختلفه برضو عشان تحسن صحتك وانتاجيتك وشغلك وكل حاجه.

بودكاست مفيد وجميل جدا ، ومن أجمل وأشهر البودكاستس اللي هتشوفها.

وده لينك البودكاست : بودكاست Seven Good Minutes .

4- Listening Time

Listening time podcast — ازاى تبدأ علي السوشيال ميديا في سنة 2023

واحده من أجمل وأفضل الطرق اللي ساعدتني كتير جدا في اني أطور من اللغه الإنجليزيه بتاعتي هي البودكاست الجميل ده. عارف انت لما تجرب حاجه لأول مره وتقول أنا ازاي مكنتش أعرف الحاجه دي قبل كده؟ أهو ده اللي حصل معايا بالظبط لما جربت أسمع بودكاست لتعليم اللغه الإنجليزيه.

الفكره كلها ان ده شخص متحدث أصلي للغه بيتكلم معاك بطئ شويه وبيحاول يفسر ويوضح الكلمات الصعبه والجديده. وبينقلك جزء كبير من الثقافه في أمريكا والعادات والتقاليد ومواضيع مختلفه كتيره.

يعني من الآخر بودكاست هيطور الإنجليزي بتاعك وكمان هيعطيك معلومات عامه وخبرات في الحياه. وأنا كنت كلمتكم عن البودكاست ده لما كنت بقولك ازاي تتعلم انجليزي.

وده لينك المقاله برضو لو حابب تاخد بصه سريعه : الطريق الأفضل لتعلم اللغه الإنجليزيه .

وده لينك البودكاست : بودكاست Listening Time .

5- بودكاست مهارات‎

آخر بودكاست معانا انهارده وهو مسك الختام برضو ، بودكاست مهارات اللي كل مره هيعلمك مهاره جديده ومفيده في حياتك.

البودكاست مش مركز علي مهاره واحده أو مجال واحد ، ولكنه مركز أكتر علي انه ينمي شخصيتك عن طريق انه بينمي مهاراتك كل يوم أكتر وأكتر.

واحد من أنجح وأجمل البودكاستس اللي ممكن تسمعها في حياتك ، وأوعدك مش هتندم أبدا لما تسمعه.

وده لينك البودكاست : بودكاست مهارات .

الخلاصه

البودكاست واحد من أجمل وأمتع الحاجات اللي اكتشفتها مؤخرا ، وبجد فرقت معايا كتير جدا في حياتي. وبرضو حققت المعادله الصعبه لانها حاجه مفيده وفي نفس الوقت مش ممله ومسليه.

وفي المقاله بتاعة انهارده حاولت أرشحلكم كام بودكاست كده من اللي بحب أسمعهم علاطول ، واللي فرقو معايا كتير ويمكن يغيرو حياتك زي ما غيرو حياتي.

وأخيراً أتمني تكون استفدت من المقاله دي ، وأتمني اني مكونش ضيعت وقتك في الفاضي ، بالتوفيق يا صديقي❤.