الطريق الأفضل لتعلم البرمجه باستخدام الموبايل فقط

تعلم البرمجه من الموبايل فقط — الطريق الأفضل لتعلم البرمجه علي الموبايل

مقدمه عن الموضوع

واحده من أهم المهارات اللي ( من وجهة نظري ) لازم كل الناس تتعلمها ، وكمان لازم تعلمها لأولادك هي البرمجه. علي الرغم من ان البرمجه ممكن تبدو ليك انها بعيده عن مجال دراستي ( الطب ) إلا ان الذكاء الاصطناعي مؤخرا بدأ يدخل في الطب بشكل كبير جدا. والذكاء الاصطناعي مبني علي البرمجه ، وبالتالي أنا وقتي في تعلم البرمجه مرحش علي الفاضي ومسيري أستفيد منها. وهنروح بعيد ليه أنا لو مكنتش متعلم برمجه مكنتش عرفت أعمل الموقع بتاعي ده لوحدي وكنت هحتاج فريلانسر يعملهولي وهدفع كتير جدا. ونفس الموضوع مع باقي المجالات كلها ، أكيد الذكاء الاصطناعي هيدخل في كل المجالات وقريب جدا كمان. وأكيد كلكم شوفتو شات جي بي تي والثوره اللي عملها في العالم كله في خلال كام يوم بس من إصداره. وخلوني أفاجئكم وأقولكم ان كل ده ما هو إلا مجرد بدايه لعصر جديد وثوره جديده في عالمنا هيكون أساسها وركيزتها الأساسيه هي البرمجه. فنصيحه من أخوك عشان تواكب المستقبل ، ابدأ اتعلم برمجه واوعدك مش هتندم أبدا. تعلم البدائيات في البرمجه والكود مش هياخد منك وقت كبير خالص يعني ، ومين عارف ما يمكن تحب المجال وتعمل كارير شيفت وتبقا مبرمج 🤷‍♂️.

ازاي تتعلم البرمجه علي الموبايل

عشان تتعلم برمجه هتحتاج خريطه أو طريق تمشي عليه عشان توصل لهدفك في أقل وقت ممكن وبأقل تكلفه ممكنه. وأنا ان شاء الله هحطلك خريطه تتعلم بيها البرمجه علي الموبايل وعلي الكمبيوتر من غير ما تدفع ولا جنيه. عشان أنا عارف ان أغلب اللي نفسهم يتعلمو برمجه لسه طلبه وفي ظل الظروف الصعبه اللي احنا كشباب عايشنها مينفعش أجي أقولك روح ادفع 5 الاف جنيه عشان تاخد كورس برمجه. وبما ان أغلب أو كل الناس دلوقتي معاها موبايل فخلوني أبدأ انهارده بخريطة تعلم البرمجه من الموبايل وبعدها ان شاء الله هحطلكم هنا خريطة التعلم من الكمبيوتر. بس فيه سؤال مهم وهو ياتري ايه الأفضل في البرمجه الكمبيوتر ولا الموبايل؟

الكمبيوتر ولا الموبايل أفضل؟

أكيد طبعا وبدون أي شك لو انت حابب تاخد موضوع البرمجه ده جد شويه وتتخصص في المجال وتشتغل فريلانسر مثلا ، فانت ضروري هتحتاج الكمبيوتر لانه الأفضل بلا أي شك. ولكن نصيحتي ليك لو انت معندكش كمبيوتر أو لابتوب هي : بلاش تشتري كمبيوتر أو لابتوب الا لما تتأكد الأول انك هتحب المجال وهتكمل فيه. فانت ممكن تبدأ الأول علي الموبايل وتبدأ بالمتاح معاك وتجرب المجال وتاخد فكره عنه باستخدام الموبايل وبعد كده روح اشتري كمبيوتر أو لابتوب بس الفرق بقا ان ساعتها هتكون انت متأكد انك فعلا حبيت المجال وانك بتستثمر فلوسك صح. لكن لو هدفك بس انك تواكب العصر وتاخد فكره عن البرمجه وخلاص فانت ممكن تكتفي بانك تاخد فكره من الموبايل. وخلوني بقا أقولكم علي طريقة تعلم البرمجه من الموبايل.

أفضل تطبيق لتعلم البرمجه علي الموبايل

الأبلكيشن اللي معانا انهارده ده غير نظرتي تماما لتعلم البرمجه علي الموبايل. أنا بصراحه قبل كده كنت ضد فكرة انك تتعلم البرمجه علي الموبايل وشايف ان الأفضل طبعا هو انك تتعلم علي الكمبيوتر وبس. لكن بعد تجربة الأبلكيشن ده غيرت نظرتي تماما ودلوقتي أقدر بكل ثقه أقول انك اه تقدر تبدأ تاخد فكره كويسه عن البرمجه وتجرب تكتب كود بنفسك وتعمل مشاريع بسيطه كمان كل ده باستخدام الموبايل بتاعك بس. والأبلكيشن اللي معانا انهارده هو أبلكيشن Solo Learn. الأبلكيشن ده متحمل أكتر من 10 مليون مره علي جوجل بلاي يعني مشهور جداً.
– وده رابط تحميل الأبلكيشن علي الأندرويد : تحميل تطبيق Solo Learn .
– وده رابط تحميل الأبلكيشن علي الـأي أو اس : تحميل تطبيق Solo Learn .

خريطة التعلم مع أبلكيشن Solo Learn

لما هتدخل علي الأبلكيشن هتلاقي حاجات كتير جدا في البرمجه ولغات كتيره جدا ممكن تتعلمها. بس الكورس اللي أنا بدأت بيه علي الأبلكيشن كان عباره عن مقدمه للغة برمجه اسمها Python ودي أشهر لغة برمجه علي مستوي العالم حالياً ، وده بردو الكورس اللي أنصحك تبدأ بيه. الكورس اسمه Introduction To Python . وبعد ما تخلصه هيكون عندك خلفيه كويسه إلي حد ما عن البرمجه ، وبعدها بقا ممكن تشوف هل انت حبيت المجال وعايز تتعمق فيه أكتر ولا لا؟ وبرضو حاول تحدد انت عندك شغف بأنهي مجال في البرمجه لان مجالات البرمجه كتيره جدا ومتنوعه زي برمجة الألعاب وبرمجة تطبيقات الموبايل والمواقع وغيرها كتير جدا فحاول برضو تعرف انت حابب انهي مجال أكتر عشان تكمل فيه وتتعمق فيه أكتر بعد كده. المهم بعد ما تخلص الكورس ده علي الأبلكيشن تقدر برضو تتعمق أكتر في لغة بايثون ، لانهم عاملين كورسات متقدمه أكتر عن لغة بايثون ، فهتلاقي كورس للمستوي المتوسط وبعده كورس للمستوي المتقدم ودول أنا ناوي أخلصهم برضو وبعدها هبدأ أتعلم برمجة الذكاء الاصطناعي واخد فكره عن الموضوع ده ( مش ناوي أتعمق خالص يعني بس حابب أعرف وأفهم ايه اللي بيحصل حوالينا ده ) ده كان بالنسبالي أنا وده لان لغة بايثون هي أكتر لغه بيستخدموها في مجال الذكاء الاصطناعي فلازم أكون فاهمها كويس. والبرمجه في الآخر هتلاقيها نفس الفكره مهما اختلفت لغات البرمجه هتلاقي الأساس واحد فانت ركز علي لغه واحده تتعلمها في البدايه زي بايثون مثلا وبعدها لما هتحاول تتعلم لغة برمجه تانيه هتلاقي الموضوع بسيط جدا. وبعد ما تخلص ال 3 كورسات دول هتكون عملت مشاريع كتيره وجربت المجال وأخدت فكره كويسه عن البرمجه ومن هنا هتبدأ رحلتك في مجال البرمجه الواسع والكبير جداا وممكن أبقا أكتبلكم موضوع بعد كدخخه عن مجالات البرمجه واعطيكم نبذه برضو عن كل مجال وازاي تتعلمه فدعواتكم بقا ان يكون فيه وقت فاضي عندي شويه عشان أقدر أظبطكم في الموضوع ده.

الخلاصه

البرمجه واحده من أمتع المهارات اللي اتعلمتها في حياتي لحد دلوقتي. ومندمتش لحظه اني بذلت فيها مجهود واتعلمتها K لاني عارف كويس جدا ان المستقبل كله هيكون مبني علي البرمجه فلازم أتعلمها عشان أواكب العصر. وحبيت أعطdك نبذه سريعه عن الموضوع وأقولك انك تقدر تتعلم بأقل الإمكانيات ، المهم بس ان يكون عندك الإراده انك تتعلم.
وده فيديو عملته عن الموضوع ده برضو ممكن تشوفه لو حابب :

وأخيراً أتمني تكون استفدت من المقاله دي ، وأتمني اني مكونش ضيعت وقتك في الفاضي ، بالتوفيق يا صديقي❤.