الطريقه الأسهل لفتح ChatGPT في الوطن العربي

الطريقه الأسهل لفتح شات جي بي تي في الوطن العربي

مقدمه عن الموضوع

طبعا كلنا شوفنا في الفتره الأخيره الضجه اللي عملها الذكاء الاصطناعي ( وخصوصاً ChatGPT ) . وده بعد ما أعلنت شركة Open AI عن منتجها الجديد واللي اسمه ChatGPT . العالم كله كان بيتكلم عن شات جي بي تي في الفتره الأخيره ، ومن ساعتها والدنيا مقلوبه.

ومش بس كده ده بقينا تقريبا كل يوم نشوف شركه مطلعه منتج جديد في الذكاء الاصطناعي. يعني من الآخر ChatGPT كان هو الشراره اللي بدات حرب الذكاء الاصطناعي.

الفكره بقا ان الذكاء الاصطناعي كده كده هيدخل في كل المجالات ( أياً كان مجالك هو ايه ) فصدقني هتلاقي الذكاء الاصطناعي هيدخل فيه.
عشان كده مهم جداً انك تعرف ازاي تستخدم أدوات الذكاء الاصطناعي ( وعلي رأسهم ChatGPT طبعا ً ) لصالحك ولشغلك.

بس فيه مشكله كبيره واجهت الدول العربيه وهي ان شات جي بي تي كان غير متاح في الدول العربيه وبالتالي محدش كان قادر يستخدمه بدون رقم أجنبي وVPN وليله كبيره أوي سعادتك.

لكن أنا انهارده جايبلك طريقه تفتح بيها ChatGPT بدون رقم أجنبي وكمان بدون VPN.

ما هو ChatGPT ؟

قبل ما أقولك ازاي تفتح ChatGPT لازم الأول تكون عارف ايه هو ChatGPT أصلاً وايه لازمته في الدنيا؟

ChatGPT تقدر تعتبره بكل اختصار مساعد شخصي ليك بيعملك تقريباً أي حاجه تطلبها منه. عايز تكتب مقاله ، عايز تبرمج موقع أو برنامج أو لعبه ، عايز تلخص كتب ، عايز تكتب كتاب كامل ، عايز تسأله عن أي سؤال كوني من بتوع بعد الساعه 12 دول. تقريباً أي حاجه ممكن تخطر علي بالك فهو يقدر يعملها في ثواني.

الفكره ان الموضوع لسه في بدايته ، وكل يوم بيتدرب وبيتحسن ، والغلطه اللي بيغلطها مبيكررهاش تقريباً. بمعني آخر كل اللي انتو شايفينه ده ماهو إلا البدايه.

طيب احنا دلوقتي عرفنا يعني ايه ChatGPT ، خلوني بقا أدخل في الموضوع علاطول.

ازاي تفتح ChatGPT في الوطن العربي ؟

بصو عشان تكونو فاهمين الدنيا ماشيه ازاي برضو ، شركة OpenAI اللي عامله ChatGPT بتسمح لأي حد انه يستخدم الذكاء الاصطناعي بتاعها في الموقع بتاعه عادي ، بس الشرط الوحيد انه بيدفع فلوس علشان يقدر يعمل كده.

طب أنا بقولك كده ليه ؟

أنا بقولك كده عشان تكون عارف ان الحاجات اللي هقولك عليها دي هي هي ChatGPT وتقدر تدخل تجربها وهتتأكد بنفسك فمتقلقش أنا أصلا مش بشتغل علي شات جي بي تي نفسه ، أنا نفسي بشتغل علي المواقع دي عادي جدا لاني عارف ومتأكد انهم واحد ، تمام كده؟ نبدأ بقا …

1- موقع Poe.com

أنا قبل كده كنت بستعمل موقع جميل جداً اسمه Poe وده موجود فيه أكتر من أداة ذكاء اصطناعي اللي من ضمنهم ChatGPT.
ومش بس كده ده انت كمان تقدر تستعمل ChatGPT الإصدار الأحدث ( اللي هو الرابع ) وده المفروض في العادي بيكون باشتراك شهري 20 دولار ، لكن الموقع بيتيحلك انك تستعمله مره كل يوم ببلاش. بس مره واحده فقط للأسف.

لكن في نفس الوقت برضو انت تقدر تستعمل شات جي بي تي العادي وهيشتغل معاك زي الفل.
وكمان شويه هقولك ازاي تقدر تستعمل أحدث إصدار من شات جي بي تي ببلاش ومن غير أي حاجه خلاص.

– وده لينك الموقع لو حابب تجربه : موقع Poe.com.

2- موقع Araby AI

أنا فضلت أستعمل موقع Poe.com لحد قريب جدا ، ولكن بعد كده ظهر موقع عربي أبهرني الحقيقه بتصميمه العظيم وإمكانياته الجباره ، وفوق كل ده بيدعم اللغه العربيه بطريقه حلوه جدا في شات جي بي تي. أنا عارف ان شات جي بي تي بيدعم اللغه العربيه بس هتحس الموضوع هنا ألطف شويه. يعني هتقدر تستعمله بالانجليزي عادي زي شات جي بي تي ، بس لما هتجرب تستخدمه بالعربي هتلاقي تجربة مستخدم حلوه جداً.

يعني من الآخر تقدر تعتبره ChatGPT وكمان عليه كام حاجه إضافيه : زي انه بيدعم العربي بصوره ممتازه ، بيحول الكلام لصوره ، ويقدر يكتبلك مقاله كامله عن أي موضوع تحبه ، ويقدر يعملك تغريده لتويتر ، وغيرها مميزات كتير ، وفوق ده كله ببلاش ومش محتاج رقم أجنبي وكمان مش محتاج VPN.

الموقع ده اسمه Araby AI وقالو ان قريب جدا هيكون موجود أبلكيشن ليهم علي الموبايل كمان. يعني من الآخر الموضوع هيكون متكامل وهتقدر تفتح شات جي بي تي من أي مكان عادي جداً.

– وده لينك الموقع برضو لو حابب تجربه : موقع Araby AI .

3- Bing AI التابع لشركة Microsoft

آخر موقع هنتكلم عنه انهارده ( وهو بالمناسبه موقع وتطبيق برضو مش بس موقع ) وهو محرك البحث Bing التابع لشركة ميكروسوفت.

لو متعرفش اللي حصل فشركة ميكروسوفت اتعاقدت مع شركة OpenAI علشان تقدر تستعمل الذكاء الاصطناعي الخاص ب ChatGPT في منتجاتها المختلفه، واللي من ضمنها محرك البحث الشهير التابع لميكروسوفت ( والمنافس لجوجل ) وهو محرك البحث Bing.

ودي أسهل طريقه تقدر من خلالها تستعمل أحدث إصدار من شات جي بي تي مجانا وبدون رقم أجنبي ، وده لان Bing بيستعمل أحدث حاجه من شات جي بي تي .

وفيه ميزه إضافيه هنا كمان وهو ان معلوماته كلها محدثه ومرتبط بالإنترنت ، ولكن بصراحه حسيت شات جي بي تي الأصلي والمواقع اللي فوق بتعطيني نتائج أفضل وبطريقه أحسن شويه في أغلب الحاجات.

ملحوظه أخيره : علشان تستعمل الموقع ده فانت لازم تفتح الموقع من المتصفح الخاص بميكروسوفت اللي هو Microsoft Edge.

– وده برضو لينك الموقع لو حابب تجربه : موقع Bing الجديد .

– وده لينك الأبلكيشن بتاعهم للأندرويد : تطبيق Bing الجديد للأندرويد .

– وده لينك الأبلكيشن بتاعهم لنظام أبل : تطبيق Bing الجديد للأي أو اس .

الخلاصه

دلوقتي مبقاش لازم تشترك في شات جي بي تي الأصلي عشان تقدر تستخدمه ، لان بقا موجود طرق تانيه مجانيه تماماً. كل موقع من فوق ممكن يكون ليه نقاط قوه إضافيه زياده عن غيره ، لكن كلهم مبنيين في الأصل علي شات جي بي تي. فحاول بقا تاخد بصه عليهم كلهم وتشوف ايه أكتر حاجه هتكون مناسبه ليك في شغلك.

وأخيراً أتمني تكون استفدت من المقاله دي ، وأتمني اني مكونش ضيعت وقتك في الفاضي ، بالتوفيق يا صديقي❤.