ازاي تبدأ علي السوشيال ميديا

مقدمه عن الموضوع

بما انك دخلت هنا فانت أكيد شايف قدامك وعارف كويس أوي قد ايه السوشيال ميديا وصناعة المحتوي غيرت حياة ناس كتيره جدا ، وحسنت من وضعهم المادي والاجتماعي وكل حاجه . والجميل بقا ان الوضع بقا سهل جدا جدا دلوقتي انك تبدأ علي السوشيال ميديا ، والمعدات بقت في متناول أغلب الناس وتقدر حرفيا تبدأ دلوقتي بالموبايل بتاعك بس. وفيه أمثله كتيره علي ناس بدأت بموبايل بسيط ووصلو لأرقام كبيره جدا علي المنصات المختلفه ، وهنروح بعيد ليه أنا لحد دلوقتي لسه بصور بالموبايل بتاعي مش بكاميرا . حاول دايما تبدأ بالمتوفر معاك ومتخليش حاجه توقفك أبدا. أهم حاجه يكون عندك محتوي كويس يفيد الناس بطريقه لطيفه ، وبلاش محتوي هابط لان صدقني هتندم بعد كده. ولازم تكون عارف كويس أوي ان مفيش حاجه بتيجي بالساهل ، يعني لازم تتعب وتلتزم انك تنزل فيديوهات علاطول ، وتحاول دايما تحسن من جودة فيديوهاتك كل مره سواء في التصوير او المونتاج أو الصوت ، ومع الوقت هتوصل لمرحله حلوه جدا .

هتحتاج ايه عشان تبدأ ؟

زي ما قولتلك فوق : مفيش حاجه بالساهل. وانت عشان تبدأ تصنع محتوي علي السوشيال ميديا هتحتاج كذا حاجه :

1 – المحتوي

المحتوي اللي هتقدمه هو أهم حاجه في الموضوع ده كله لان هو اللي هيحدد هل انت هتنجح علي السوشيال ميديا ولا لا. فحاول تشوف ايه الحاجه اللي انت بتعملها كويس وايه الحاجه اللي انت شغوف بيها وجرب تشاركها مع الناس ، وصدقني هتتفاجئ من كمية الجمهور اللي هيدعمك ويتابعك. وزي ما قولتلك فوق حاول تختار محتوي محترم ومناسب ويكون فخر ليك انك بتقدمه مش بالعكس تتكسف تقوله قدام الناس.

2- المعدات

معدات التصوير اللي هتبدأ بيها مبقتش مشكله خالص دلوقتي لانك حرفيا تقدر تبدأ بالموبايل بتاعك فقط وتطلع تصور في نور ربنا كمان ( الشمس ) يعني حتي مش محتاج إضاءه. بس لو حابب تبدأ بدايه أفضل فانت ممكن تحوش حوالي 300 جنيه تجيب بيهم رينج لايت وستاند للموبايل ومايك عشان تحسن من جودة الصوت ، وأنا هرشحلك الحاجات اللي أنا شخصيا بدأت بيها :

– أولاً الاستاند والرينج لايت : ودول تقدر تشتريهم أونلاين من أمازون أو تقدر تشتريهم بنفسك من أي محل بيبع إلكترونيات ومعدات تصوير ، أنا شخصيا كنت اشتريتهم من أمازون وكانو كويسين جدا جدا.

معدات التصوير لليوتيوبرز — ازاى تبدأ علي السوشيال ميديا في سنة 2023

وده لينك الشراء من أمازون : اضغط هنا لشراء الرينج لايت والاستاند من أمازون .

ولو حبيت تعلي من الاضاءه بعد كده وتجيب حاجه أفضل ، فانت ممكن تجيب سوفت بوكس كبير هيعطيك اضاءه أنعم وأفضل. بس كبدايه الرينج لايت والحامل دول كويسين.

-ثانيا المايك : طبعا هتلاقي مايكات كتيره في السوق وأغلب المايكات بتكون غاليه بس بلاش تستخسر في المايك ، المايك اللي أنا بدأت بيه كان كويس وحلو جدا بالنسبه لسعره وفضل معايا فتره كبيره جدا ، وعلي فكره لسه شغال كويس لحد دلوقتي ، لكن كل ما تجيب مايك أعلي كل ما يكون أفضل طبعا.
المايك بتاعي كان BOYA M1 وتقدر تشتريه برضو من أمازون.

ميكروفون لتسجيل الصوت في الفيديوهات — ازاى تبدأ علي السوشيال ميديا في سنة 2023

وده لينك الشراء من أمازون : اضغط هنا لشراء مايك BOYA M1 من أمازون .

3- المونتاج

تعلم المونتاج — ازاى تبدأ علي السوشيال ميديا في سنة 2023

بعد ما تصور الفيديو فيه خطوه مهمه جدا طبعا وهي المونتاج. وده موجود ليه موضوع كامل بنتكلم فيه ازاي تتعلم مونتاج سواء علي الموبايل أو علي الكمبيوتر ، وايه مميزات وعيوب كل حاجه منهم وتفاصيل تانيه كتيره. كل اللي عليك هو انك تدخل بس علي صفحة التعلم وتختار المونتاج اللي انت عايز تتعلمه سواء موبايل أو كمبيوتر ، وده لينك صفحة التعلم : اضغط هنا للذهاب لصفحة التعلم .

4- الصبر والاستمراريه

الصبر والاستمرايه دول أهم شرطين لو عايز تنجح في أي حاجه في الحياه عموما مش بس السوشيال ميديا. يعني لو عايز تخلص أي كورس أو تتعلم أي حاجه جديده أو تنجح علي السوشيال ميديا فانت لازم تعود نفسك انك تصبر وتفضل مستمر في اللي بتعمله ، علي الرغم من أي احباطات أو كومنتات سلبيه. طبيعي جدا هتلاقي ناس بتحبطك سواء أقرب الناس ليك أو كومنتات سلبيه علي المحتوي اللي بتقدمه بس متسمحش لأي حاجه من دول انها توقفك مهما حصل. مفيش حد نجح علي السوشيال ميديا من غير ما يتعرض لمضايقات أو شتايم أو إهانات مهما كان نوع المحتوي اللي بيقدمه ولازم تعرف ان ده طبيعي ، وخلي معيارك دايما هو النسبه بين الناس اللي حبو الفيديو والناس اللي كتبو كومنتات سلبيه ، شوف كام لايك علي الفيديو في مقابل كام كومنت سلبي وهتلاقي ان اللايكات أكتر والناس اللي بيحبوك أكتر فاطمن.

الخلاصه

السوشيال ميديا بقت حاجه ضروريه دلوقتي من وجهة نظري ان كل الناس تشارك فيها مع اختلاف المجالات ، بس أيا كان مجالك فانت لازم تتعلم ازاي تستغل السوشيال ميديا وتسوق بيها لنفسك أو لشغلك لان صدقني ده هيفرق معاك جدا في حياتك. وأتمني تستخدم كل النصايح دي في انك تقدم محتوي ذو قيمه للناس وبلاش محتوي هابط.
وده فيديو عملته عن الموضوع ده برضو ممكن تشوفه لو حابب :

وأخيراً أتمني تكون استفدت من المقاله دي ، وأتمني اني مكونش ضيعت وقتك في الفاضي ، بالتوفيق يا صديقي❤.